Увс аймгийн Улаангом сумын Засаг даргаар ажиллаж байсан Ц.Пүрэвжав албан тушаалын байдлаа урвуулан ашиглаж бусдад давуу байдал олгон хууль бусаар газар олгосон хэргээр АТГ-т шалгуулж байгаа аж. Тус хэргийн талаар Ц.Пүрэвжаваас тодрууллаа.

     Тэрбээр “Би Улаангом сумын Засаг даргаар таван жил ажилласан. Тус хугацаанд нэг ч удаа хууль бус ажил хийж байгаагүй. Харин сүүлийн үед хууль бусаар газар олгосон гэх хэрэгт холбогдож, АТГ-т шалгуулж байгаа. Гэхдээ надад хийсэн буруу зүйл байхгүй. Учир нь, би Улаангом сумын 260 мянга гаруй га газрын алийг нь зохион байгуулалтын төлөвлөгөөнд тусгасан, тусгаагүйг мэдэхгүй шүү дээ. Гэтэл Газар зохион байгуулалтын хэлтсийн дарга газар олгох ёстой төлөвлөгөөндөө 3-4 айлын газар нэмчихсэн байсан.Түүнийг нь би “Газар олгох төлөвлөгөөнд оруулах боломжгүй газар байна. оруулахгүй” гээд буцааж байсан юм. Дараа нь Газрын харилцааны хэлтсийн дарга нь  надаар гарын үсэг зуруулахдаа “Онцгой байдлын нийгмийн асуудлын хүрээнд 3-4 айлд газар олгох зөвшөөрөл олгох хэрэгтэй байна” гэж байсан. Гэтэл Газрын харилцааны хэлтсийн даргын хийсэн энэ асуудал хууль бус болчихоод байгаа юм. Намайг ИТХ-д удаа дараа нэр дэвшиж сонгогдсон учир дахин гарч ирж магадгүй гэх үндэслэлээр харлуулж байна гэж ойлгож байгаа” гэлээ.