Увс аймгийн төвд тарваган тахлын сэжигтэй тохиолдол өнөөдөр (2020.08.31) бүртгэгдэж, тус аймгийн нэгдсэн эмнэлэгт тусгаарлалаа. Тодруулбал, Улаангом сумын харьяат, эрэгтэй өндөр халуунтайгаар энэ сарын 31-ний өглөө аймгийнхаа Нэгдсэн эмнэлэгт хэвтсэн байна.

Одоогийн байдлаар түүнийг Халдвартын тасагт хэвтүүлэн эмчилж буй бөгөөд биеийн байдал нь хүнд, өндөр халуурч, 41-ээс буухгүй байгаа юм. Өвчтөнөөс тарваган тахал мөн эсэхийг тогтоох шинжилгээ авч, дээжийг нь Улаанбаатар хот руу явуулсан байна.

Тэрбээр тарвага өвчсөний улмаас ийнхүү өндөр халуурч, улмаар эмнэлэгт хүргэгдсэн. Түүнтэй хамт байсан гэр бүлийн хүмүүсийг бүгдийг нь тусгаарлах арга хэмжээ авч, хавьтлуудыг илрүүлж байгаа юм.